Песнь 1

Ирмос: Воду лрошед, яко сушу, и египетскаго зла избежав, израильтянин вопияше: Избавителю и Богу нашему поим.

От земнородных возрастши и Зиждителя рождши, радуйся, наша похвало, Богородице Чистая, Тя, яко обладающую тварьми, величаем.

Своего приемши Содетеля, яко Сам восхоте, от безсеменнаго Твоего чрева паче ума воплощаема, Чистая, тварей воистину явилася еси Владычица.

Пречистая Богородице, Тобою спасение нетленно даровася и неразрушимо веселие и надежда, покров и Держава и душам нашим прибежище.

Царица еси всех едина, Богу, Богородительнице Чистая, святый престол и палата Христа Бога, Егоже моли о чтущих икону Твою честную, подати грехов оставление.

Буди нам помощь, Твоим рабом, Владычице Чистая, верно молящим Тя, яко милостива, и державны нас воздвигни, во еже пети Тя.

Спасаеши, яко можеши, присно всех, яко рождши Владыку, владычествия мя сластнаго и страстей свободи, да пою, радуяся: радуйся, Престоле Вышняго, Благословенная.

Песнь 3

Ирмос: Небеснаго круга Верхотворче, Господи, и Церкве Зиждителю, Ты мене утверди в любви Твоей, желаний краю, верных утверждение, Едине Человеколюбче.

Надеждо миру державная, покрове и предстательство, Всесвятая Дево, не презри, Благая, моления рабов, от любве Тя присно ублажающих.

Воплощся от утробы Твоея Господь, господствуя тварию, и Тебе, Дево, Госпожу показав видимым же всем и невидимым, яко Матерь прославляя Непорочную.

Марие, честное Владыки приятелище, возстави ны, падшия в пропасть лютаго отчаяния, и прегрешений, и скорбей, Ты бо еси грешных спасение, и помощь, и державное предстательство и спасаеши рабы Твоя.

Сущая Владычица наша, Всесвятая Дево, молящи не престай, Егоже родила еси, Бога, Царствия Своего нас сподобити.

Князь мирный прииде на престол Давидов, царствуя из Тебе, Богородице, Бог воплощаемь. О, чудо! и, брань разрешь, почте князи моавитския и Тебе, Рождшую, Царицу показа.

Царице Дево, рождшая Царя Христа, ущедри и спаси мя, страстьми преклоненнаго, верою утверди и настави мя ко спасения стези, верных спасение.

Седален, глас 4

Да открыеши нам всем множество Твоея милости и благости безпредельную пучину, грехи рабов Твоих вся изглади. Имаши бо, Всенепорочная, яко Мати Божия, власть над созданием и силою Твоею изводиши вся, яко хощеши, ибо благодать Духа Святаго, яве всельшаяся в Тя, содействует Ти во всем, присно Всеблаженнейшая.

Песнь 4

Ирмос: Услышах, Господи, смотрения Твоего таинство, разумех дела Твоя и прославих Твое Божество.

Тя, Богоневесто, похвалу всем Христос яви и Державу, поющим верно Твое таинство.

Станем благоговейно в дому Бога нашего и возопиим: радуйся, миру Владычице, радуйся, Марие, Госпоже всех нас; радуйся, едина непорочная в женах и добрая; радуйся, столпе огненный, вводящий в Вышнюю жизнь человечество.

Прибежище, Заступницу и сильный покров Тя имуще, Благословенная Пречистая Мати Божия. Твоею помощию и покровом Божественным сохрани нас.

Дево господоименитая и Царица всея твари, многими пророки пронареченная и рождшая Царя Небесных сил, Царствия Небеснаго, Госпоже, всех нас сподоби молитвами Твоими.

Чины ангельския удивляет, Богородице, тайны Твоея глубина, бесы же смущает Твоя икона, ейже мы кланяемся, чтуще Тя, Божию Матерь.

Высшую Херувим и всея твари восхвалим, Едину, рождшую Зиждителя и Господа и отверзшую двери райския нам.

К Тебе прибегаю, Единей Державней, верных покрову, на Тя надежду возлагаю спасения моего, Пресвятая Владычице Богородице, не презри мене.

Песнь 5

Ирмос: Просвети нас повелении Твоими, Господи, и мышцею Твоею высокою Твой мир подаждь нам, Человеколюбче.

Богородице, всех Царице, православных похвало, еретичествующих шатания разори, мир же подаждь чтущим, Пречистая, честный Твой образ.

Державным Твоим кровом от враг навета нас, Чистая, Твоя рабы, сохрани вся невредны, Тя бо стяжахом едину прибежище в скорбех.

Скорейшею молитвою, бодрым Твоим покровом, державною Твоею, Владычице Чистая, помощию, ныне соблюди верныя Твоя рабы от всякаго сопротивнаго прилога и страстей, и прегрешений, и напастей спаси.

Царица еси Царя Христа и Господа, паче слова рождши Разоршаго адова царствия, Егоже прилежно моли, Отроковице, Вышняго Царствия сподобити вся, чтущия Тя.

Избавляющи явися, Пречистая, от страстей наведения и бесов лукавых Твоего раба, стяжавшаго Тя державное заступление и Предстательницу Непостыдную.

Песнь 6

Ирмос: Молитву пролию ко Господу и Тому возвещу печали моя, яко зол душа, моя исполнися и живот мой аду приближися, и молюся, яко Иона: от тли, Боже, возведи мя.

Преукрашена славою Божественною, Честная Царица Сыну Своему и Богу предстоит, спасение душевное нам просящи.

Благодетеля рождши, добрых Виновнаго, благодеяния богатство всем источи: вся бо можеши, яко сильнаго в крепости Христа рождши, Богоблаженная.

Да приидет ныне на ны державная Твоя длань, Владычице, и чаемыя человеческия скорби да избавит нас.

Владычице, Мати Избавителя, приими молитвы Твоих непотребных раб, имже воздаждь избавление грехов и богоугодныя жизни приятное исправление.

Царица еси всех едина, Богу, Богородительнице Чистая, святый престол и палата Христа Бога, Егоже моли о чтущих честную икону Твою, подати грехов оставление.

Раб, ныне прихожду к Тебе, Матери всех Бога, от всех избавится напастей моляся. Но, о Богородительнице, царствующи с Сыном Твоим, христианский род сохраняй.

Державный Твой покров, Богородительнице, яко Заступница сущи, даждь ми вскоре, напастьми одержиму, и невредна от сих сохрани мя.

Кондак, глас 8

Взбранней Воеводе, Заступнице нашей Державней, песни благодарственныя приносим о даровании нам иконы Ея святыя, еюже ограждаеми, ничесоже устрашимся, не от человек бо спасение наше, но Преблагословенныя Владычицы милосердием. Темже днесь радуемся и празднуем светло, яко прииде Державная на стражу земли Своея.

Ин кондак, глас тойже

Избранной от всех родов Заступнице рода христианскаго, покровом Своея благости покрывающей страну нашу православную, благодарственныя пения приносим Ти, Владычице, о явлении нам чудныя иконы Твоея Державныя. Ты же, яко Всемилостивая Заступница всех, с верою к Тебе притекающих, от всяких нас бед свободи, да зовем Ти: радуйся, Матерь Божия Державная, Заступнице Усердная рода христианскаго.

Песнь 7

Ирмос: От Иудеи дошедше, отроцы в Вавилоне иногда верою Троическою пламень пещный попраша, поюще: отцев Боже, благословен еси.

Богоотец убо Давид Твою славу написует, Дево, и Тебе тварей Царицу явленно пророчествует, предстоящую одесную, Всенепорочная, Бога отец наших.

Царица Дева, златою одеждою украшена, Сыну Царю ныне предстоит, Яже без сравнения Ангел превышши.

Родове Тя вси блажат, Чистая, Иисус бо един, рождейся от Твоея утробы, Той, яко весть, сотвори, Отроковице Дево, с Тобою величия, Егоже моли спастися стаду и людем Твоим.

Царица всех, пришедши святою иконою Своею, Небесный кров на славу нам устави, имже спасаемся от невидимых враг нахождения, к Сыну Ея вопиюще: благословен Бог отец наших.

Яко жениха Тя красный чертог, яко Владычню палату одушевленну, яко порфиру всезлатую, яко краснейшее обителище Христово, Владычице всех, умоляющаго Тя спаси мя.

Отчаявся помощи всякия, к Тебе, Пренепорочная, Державной Хранительнице и Покрову, притекох: не отрини убо мене от Божественнаго покрова Твоего.

Песнь 8

Ирмос: Царя Небеснаго, Егоже поют вои Ангельстии, хвалите и превозносите во вся веки.

Кто не воспоет Тя от земнородных, Нескверная, Чистая Голубице, Ты бо родила еси нам Свет великий, жизни богатство, Иисуса Спаса, Егоже поем, хваляще яко Господа, и превозносим во вся веки.

Тебе, светлому Избавителя свещнику, прекрасный сплетше лик, поем: вся дела Господня, пойте непрестанно Деву Марию и превозносите Ю во веки.

Троицы явилася еси честный храм, в Немже Отец — любовию, Сын — плотию, Дух Святый нашествием обитель Себе сотвори, Един истинный Бог наш, Егоже умоли о нас, Предстательнице всемощная.

Позлащенною ризою, якоже Царицу, Сын Твой просветив зарею Духа, Тебе одесную Себе постави, Пречистая, Егоже превозносим во вся веки.

Ты — дверь Царя Небес и храм славы Его, Дево Всепетая, отверзи нам двери милосердия и введи ны молитвами Твоими в жилище Небесныя славы.

Мати Пресвятая, Еяже молитвами род человеческий присно соблюдается, поклонися Отцу, умоли Сына, призови Святаго Духа и умилостиви Бога, в Троице Единаго, о множестве грехов наших, да, Тобою помиловани бывше, Творца и Тебе благословим отныне и до века.

Песнь 9

Ирмос: Воистину Богородицу, Тя исповедуем, спасеннии Тобою, Дево Чистая, с Безплотными лики Тя величающе.

Речем Твоих устен, Всечистая, последующе, Тя ублажаем, с Тобою бо воистину величия сотворивый Господь возвеличи Тя и истинную Божию Матерь, рождейся из чрева Твоего, показа.

Приклонивый Небеса в Тя, Дево, вселися и ныне на молитву Твою зрит, Богородице Чистая, Твое, Царице, исполняя прошение, Емуже за ны усердно помолися, на Тя бо надеемся, Благословенная.

Святых Святая, Дево Чистая, святых Святаго родила еси, всех освящающаго, Христа Избавителя. Темже Тя, Царицу и Владычицу всех, яко Матерь Зиждителя тварей проповедуем.

Предъизбранная от всех родов, услыши глас наш и даруй прощение душ наших, избавление страстей и болезней, вся могущая, яко Мати Божия.

Царицу Деву Тя проповедует Давид, Пречистая, Чистую, темже молим Тя: Небеснаго ны Царствия сотвори наследники, да ублажаем Тя.

Приими еже от души моление мое, Пречистая Владычице, Яже Бога рождши плотию, к Тебе бо прибегох, к державней помощи, да не погрешу надежды моея.

Светилен

Владычице, всех Владычица и всех вышшая, всех же превосходящая Горних воинств, простри руку державну и сохрани мир, священники благослови, Тебе священнодействующия, монахи же прости, молящияся Тебе, отечество наше соблюди, Святая Богородице. И ныне нас сподоби видети Небесное Царство и райскую дверь, егда сядет Судия судити вселенней во втором и Страшном Судилище, Владычице Ангелов.

Кондак 1

Избранней от всех родов Заступнице рода христианскаго, покровом Своея благости покрывающей страну нашу православную, благодарственная пения приносим Ти, Владычице, о явлении нам чудныя иконы Твоея «Державныя». Ты же, яко Всемилостивая Заступница всех с верою к Тебе притекающих, от всяких нас бед свободи, да зовем Ти:

Радуйся, Мати Божия Державная, Заступнице усердная рода христианскаго.

Икос 1

Ангелом радость приимшая, благоволила еси, Владычице, возвестити старице благочестивей радость о явлении иконы Твоея честныя «Державныя», юже и обретше по указанию Твоему, яко знамение милости Божией к нам, грешным, благодарственно вопием Ти сице:

Радуйся, воли Господней тайны нам открывающая; радуйся, гнев Его праведный, на ны движимый, умягчающая.

Радуйся, зловерия нечестивых обличение; радуйся, гордыни их низложение.

Радуйся, веры христианския утверждение; радуйся, почитания святых икон освящение.

Радуйся, тихое пристанище спасения душ наших; радуйся, Всемилостивая Заступнице наша у престола Святыя Троицы.

Радуйся, от бед и скорбей наше избавление; радуйся, Церкве Православныя утверждение.

Радуйся, Звездо Невечерняго Света, нас озаряющая; радуйся, Матерь Света, всех просвещающая.

Радуйся, Мати Божия Державная, Заступнице усердная рода христианского.

Кондак 2

Видящи, Всенепорочная, с высоты небеснаго жилища Своего, идеже с Сыном Твоим во славе пребываеши, скорбь верных рабов Твоих, яко гневнаго ради Божия посещения вера Христова поругаема бывает нечестивым зловерием, благоволила еси явити нам икону Твою «Державную», да вси христолюбивии людие усердно молятся пред нею, вопиюще Богу: Аллилуиа.

Икос 2

Разуму нашему просвещение свыше исходатайствуй, Пресвятая Богородице, да познаем, что есть воля Божия благая, угодная и совершенная, и сердце направи, еже со усердием творити ю, Тебе же, Всемилостивая Заступнице, непрестанными гласы восхваляти:

Радуйся, явлением честныя иконы Твоея тьму лютых обстояний от нас отгоняющая; радуйся, лучами чудес всех просвещающая.

Радуйся, душевными и телесными очами ослепших прозрение; радуйся, омраченных смыслов просвещение.

Радуйся, всех христиан вожделенная Помощнице; радуйся, всех уповающих на Тя непостыдная надеждо.

Радуйся, вдов и сирот надежный покрове; радуйся, алчущих Питательнице.

Радуйся, духовных сокровищ Подательнице; радуйся, богомудрых премудрая доброто.

Радуйся, пресветлая, Божественная красото; радуйся, обоняние Христова благоухания.

Радуйся, Мати Божия Державная, Заступнице усердная рода христианскаго.

Кондак 3

Силу Божественныя благодати даруй нам, Пресвятая Богородице, во еже неуклонно и непреткновенно ходити нам спасительным путем Христовых заповедей, сердцем же и устами непрестанно воспевати Всемогущему Богу: Аллилуиа.

Икос З

Имуще Тя, Богоизбранная Заступнице рода христианскаго, яко зарю светлую, просвещающую душ наших темноту и разгоняющую мрак сердечнаго неведения нашего, припадаем к честней иконе Твоей «Державней» и с умилением вопием Ти сице:

Радуйся, сохраняти и спасати всех призывающих Тя обещавшая; радуйся, прославляющих Тя прославляющая.

Радуйся, к Сыну Твоему и Богу нашему молитвы верных приносящая; радуйся, благодать Твою иконам Твоим честным даровавшая.

Радуйся, всю вселенную лучами Твоея благодати озарившая; радуйся, премудрости Божия приятелище.

Радуйся, Божественныя благодати Подательнице; радуйся, яко Тобою от вечныя смерти свобождаемся.

Радуйся, яко Тобою безконечныя жизни сподобляемся; радуйся, честнейшая Херувим и славнейшая Серафим.

Радуйся, Матерь Света и Царице Небесная; радуйся, Владычице, Всемилостивая за нас пред Богом Заступнице.

Радуйся, Мати Божия Державная, Заступнице усердная рода христианскаго.

Кондак 4

Буря житейскаго моря сокрушает духовный корабль наш волнами мирских попечений, и мир убогих душ наших мятется. И где обрящем тихое пристанище спасения? Токмо на Тя возлагаем надежду, Владычице; имущи бо державу непобедимую, от всяких бед, глада, скорбей и болезней избави нас, верно вопиющих Богу: Аллилуиа.

Икос 4

Слышавше православнии людие повеление Твое, Владычице, молитися пред образом Твоим «Державным», со умилением сердечным прибегают к Твоему всесильному заступлению у престола Всемогущаго Бога и благоговейно вопиют Ти сице:

Радуйся, горняго мира украшение; радуйся, дольняго мира заступление.

Радуйся, Дщи благословенная Отца Небеснаго; радуйся, Родительнице неискусомужная Сына Предвечнаго.

Радуйся, демонския полки побеждающая; радуйся, враги спасения человеческаго посрамляющая.

Радуйся, яко волею Твоею сокрушаются еретические главы; радуйся, яко вернии Тобою сподобляются славы.

Радуйся, телес наших безмездная Целительнице; радуйся, душ наших к Царствию горнему Путеводительнице.

Радуйся, яко сотвори Тебе величие Сильный; радуйся, яко призре на смирение Твое Господь.

Радуйся, Мати Божия Державная, Заступнице усердная рода христианскаго.

Кондак 5

Боготечная звезда явися нам, Владычице, честная Твоя икона «Державная», страну Российскую всю обтекающая и лучами чудес Твоих осиявающая всех блуждающих по морю страстнаго жития, мрак печалей и мглу всяческих недуг и скорбей прогоняющая и наставляющая на путь спасения с верою к Тебе притекающих и вопиющих Богу: Аллилуиа.

Икос 5

В дни лютых скорбей и злых обстояний явила еси нам, Владычице, велию милость обретением честныя иконы Твоея «Державныя», да вси, с верою молящиися пред нею, приимут здравие и душ спасение. Сего ради и мы, прославляюще Твое милосердие неизреченное, усердно вопием Ти сице:

Радуйся, светило незаходимое, светом истиннаго богопознания нас просвещающее; радуйся, Вратарнице, двери райския верным отверзающая.

Радуйся, многотекущая река Божественныя благодати; радуйся, неистощимый источниче святыни.

Радуйся, ко благочестию наша Наставнице; радуйся, душ наших освящение.

Радуйся, кающихся грешников с Богом примирение; радуйся, добрыя обеты приемлющая.

Радуйся, благим намерениям способствующая; радуйся, злыя начинания разрушающая.

Радуйся, вражия козни расторгающая; радуйся, скорая человеком Помощнице.

Радуйся, Мати Божия Державная, Заступнице усердная рода христианскаго.

Кондак 6

Воспеваем Твое милосердие досточудное и многое к нам снисхождение, Пресвятая Богородице, не престаеши бо молитися о нас, грешных, Сыну Твоему и Богу нашему, еже отвратити гнев Его праведный, на ны движимый, и помиловати всех, верно вопиющих Богу: Аллилуиа.

Икос 6

Возсиявает в души наша, омраченныя скорбию и унынием от множества согрешений, свет благодатнаго утешения, и сердце наше исполняется веселия и радости, егда непрестанными Твоими, Владычице, вразумлениями возбуждаеши нас вопити к щедрому Богу, да милостив будет и простит нам прегрешения наша. Не премолчи убо, Владычице, наставляющи и вразумляющи нас, зовущих Ти сице:

Радуйся, в скорбех и болезнех долготерпению нас научающая; радуйся, вся помышления наша к распятому за грехи мира Спасителю устремляющая.

Радуйся, страдания Его и крестную смерть в памяти нашей обновляющая; радуйся, правосудием Божиим к ожесточенным и нераскаянным нас устрашающая.

Радуйся, ожиданием будущих небесных благ нас услаждающая; радуйся, к наследству нетленному и вечному нас приводящая.

Радуйся, наследниками Царствия Божия нас сотворяющая; радуйся, трапезо святая, хлебом жизни нас питающая.

Радуйся, маслино благоплодная, елеем милости сердца умягчающая; радуйся, яко молитвою пред иконою Твоею приемлем духовное утешение.

Радуйся, яко сердцам нашим даруеши благодатное сокрушение; радуйся, яко благостынею Твоею угашаеши в нас огнь нечестия.

Радуйся, Мати Божия Державная, Заступнице усердная рода христианского.

Кондак 7

Хотяй всем человеком спастися и в разум познания истины прийти, премилосердный Господь и Создатель наш посла во дни гневнаго посещения Своего ангела пресветла в новоявленнем образе Твоем «Державнем», да вси, с верою молящиися пред ним, приимут помощь и заступление Твое всесильное и радостно вопиют Всемогущему Богу: Аллилуиа.

Икос 7

Новую показа милость всех Творец и Владыка наш Господь, егда положи во гневе Своем наказати род человеческий огнем, мечем, гладом и болезньми, сотвори сие наказание для многих человеков ко вразумлению и исправлению во спасение душ. Сего ради и мы, Владычице, припадающе к Пречистому образу Твоему «Державному», усердно молим Тя: не даждь нам погибнути до конца, но милосердия двери отверзи нам, вопиющим Ти сице:

Радуйся, неприступнаго Божества селение; радуйся, ангельское непрестающее удивление.

Радуйся, рабов Божиих тайное вразумление; радуйся, Заступнице всех сущих в скорбех и болезнех.

Радуйся, благодатное безстрастие ищущим его подающая; радуйся, всех в чистоте целомудрия живущих зело любящая.

Радуйся, пристанище небурное подвижников благочестия; радуйся, гневом Божиим вразумляющая сынов нечестия.

Радуйся, безмолвствующих сладкая Собеседнице; радуйся, отшельников Христа ради крепкое упование.

Радуйся, постников Божественное радование; радуйся, пустынножителей тихое веселие.

Радуйся, Мати Божия Державная, Заступнице усердная рода христианскаго.

Кондак 8

Странни и пришельцы есмы на земли сей: житие бо наше суетно и маловременно есть. Мы же смерти безвестное во ум никогдаже приемлем, ни помышляем о Страшнем судищи Христове, в немже имамы праведному Судии предстати и дати ответ о всяком же деле и слове. Темже молим Тя, Владычице: возбуди нас скоро от сна греховнаго, да не постигнет нас час смерти неисправленных и да сподобимся Твоим ходатайством получити беззакониям нашим прощение и во гласе радования воспевати Христу Богу: Аллилуиа.

Икос 8

Вся бывши горе, к небесным взята еси и земных не оставляеши, Пресвятая Богородице, священным Твоим предстательством: имаши бо дерзновение к Сыну Твоему и Богу нашему. Темже утверди, Владычице, в мире глубоце страну нашу православную и вся полезная даруй рабом Твоим, да величающе воспеваем Ти тако:

Радуйся, умным очесем нашим горький и страшный час смертный представляющая; радуйся, на кийждо день, аки уже на последний жития нашего, взирати нас научающая.

Радуйся, любити мир и яже в мире нам воспрещающая; радуйся, пристрастие к тленному богатству из сердц наших искореняющая.

Радуйся, вся блага земная быти привременна и скоропреходяща нам показующая; радуйся, славы человечи, аки тени преходящия, искати нам возбраняющая.

Радуйся, яко сладчайшее имя Господа Иисуса Христа устами непрестанно произносити и во уме держати нас побуждаеши; радуйся, яко от празднословия, многоглаголания, паче же от кощунства нас удержаваеши.

Радуйся, яко воздержанию в пищи и питии приобучити нас печешися; радуйся, яко Твое за нас ходатайство сильно есть пред Богом, еже не вверженным нам быти во тьму кромешнюю.

Радуйся, яко присно внушаеши нам омывати грехи своя слезами покаяния, да избавимся геенны адския; радуйся, яко побуждаеши нас день и нощь молитися, да не посланы будем со демоны мучитися.

Радуйся, Мати Божия Державная, Заступнице усердная рода христианскаго.

Кондак 9

Всякое естество ангельское удивися делу Твоего милосердия, Господи, яко даровал еси нам толико твердую и теплую Заступницу роду христианскому во дни гневнаго Своего посещения, нам невидимо сопребывающую, слышащую же Тебе поющих: Аллилуиа.

Икос 9

Витии многовещаннии, непросвещеннии светом истиннаго богопознания, поклонишася златому тельцу. По слову же апостола, всяк любостяжатель есть идолослужитель. Сего ради Божие гневное посещение всему миру зряще, и мы, грешнии, смиренно молим Тя, Владычице: умилостиви Создателя, да потщится гнев Свой праведный преложити на милость и помиловати нас, вопиющих Ти сице:

Радуйся, яко Твоея помощи и заступления никогдаже нас лишаеши; радуйся, яко ум наш, омраченный небрежением, светлым Твоим покровом озаряеши.

Радуйся, яко Тобою от страстей телесных избавляемся; радуйся, яко Тобою сладостей духовных исполняемся.

Радуйся, твердое Православия укрепление; радуйся, честное Пресвятыя Троицы носило и похваление.

Радуйся, и во временней жизни полезная нам подающая; радуйся, душевныя раны наша елеем спасительным умащающая.

Радуйся, яко из рова беззаконий наших рукою Твоея помощи нас исхищаеши; радуйся, яко греховный сон душевредныя нашея лености отрясаеши.

Радуйся, душевное умиление и сердечное сокрушение в нас раждающая; радуйся, яко твориши всем спастися, в державный покров Твой прибегающим.

Радуйся, Мати Божия Державная, Заступнице усердная рода христианскаго.

Кондак 10

Спасти хотя многия люди от обдержащих их скорбей и болезней и веру их утвердити во всесильное заступление Твое, Владычице, даровала еси нам изображение честныя иконы Твоея «Державныя», да вси, видяще являемую Тобою милость, вопиют со умилением Богу: Аллилуиа.

Икос 10

Стена явилася еси, Богородице Дево, Российстей стране честными Твоими иконами, изливающи чудеса во бранех и осеняющи благодатною помощию Твоею христолюбивых воинов. Под державным бо покровом Твоея благости Российская страна созидашеся, и врата адова не одолеша Православныя Церкве Христовы. Сего ради припадающе к честней иконе Твоей «Державней», радостно вопием Ти сице:

Радуйся, Российския страны покрове и утверждение; радуйся, от нашествия иноплеменных избавление.

Радуйся, сущих в пленении свобождение; радуйся, от глада и болезней наше спасение.

Радуйся, саде земли обетования; радуйся, цвете Божественнаго саждения.

Радуйся, лозо добродетельная винограда Христова; радуйся, древо чудоточное рая Иисусова.

Радуйся, жилище и дом Христа Бога нашего; радуйся, вместилище неизреченныя Его славы.

Радуйся, Владычице, Всемилостивая Подательнице щедрот; радуйся, яко много может молитва Твоя пред Сыном Твоим и Богом нашим.

Радуйся, Мати Божия Державная, Заступнице усердная рода христианскаго.

Кондак 11

Пение хвалебное и благодарственное приносим Ти, Владычице, под державным бо покровом Твоея благости пребываем в непостыдней надежде всесильнаго заступления Твоего за нас, грешных, и все упование наше на Тя возложивше, радостно вопием Богу: Аллилуиа.

Икос 11

Светильницы наши угасоша, елея же благих дел не имамы, во еже возжещи благодать Духа Святаго. И где обрящемся, окаяннии, сном греховным отягченнии, егда постигнет нас внезапу в полунощи час кончины нашея? Но да не услышим и мы, якоже юродивыя девы, грознаго гласа Жениха: не вем вас! Помози нам, Владычице, наполнити сосуды душ наших елеем благих дел, паче же милосердия и смирения, да благодарственно воспоем Ти сице:

Радуйся, яко воспоминанием грядущаго грознаго суда Божия от грехов нас отреваеши; радуйся, яко души наши, аки невесту, ко сретению прекраснаго Жениха Христа предуготовляти нас поучаеши.

Радуйся, яко возбуждаеши нас на всяк день же и час приносити Христу Богу молитвы, прошения и благодарения; радуйся, яко с мудрыми девами, душами праведных, внити в брачный чертог Сына Твоего и Бога нашего помогаеши.

Радуйся, яко в ризу непорочности и чистоты облещися нам способствуеши; радуйся, яко стати нам на Страшнем суде Христовом одесную Его ходатайствуеши.

Радуйся, яко благоутробие Божие о причастии нас лику избранных умоляеши; радуйся, яко ум наш, омраченный небрежением, светом Своим озаряеши.

Радуйся, яко голубину простоту и агнчу кротость стяжати нам приискренне желаеши; радуйся, яко самоотвержению и отречению от злыя нашея воли приобучити нас тщишися.

Радуйся, яко младенческое незлобие даровати нам способствуеши; радуйся, яко хладное сердце наше молитвами воспламеняти нам помогаеши.

Радуйся, Мати Божия Державная, Заступнице усердная рода христианскаго.

Кондак 12

Благодать прияла еси, Владычице, от Всемогущаго Господа Бога миловати благочестивых чад Церкве Христовы и вразумляти нечестивых сынов ея. Сего ради, притекающе под державный покров Твоея благости, усердно молим Тя, Владычице: избави нас от ухищрений духов злобы, разслабляющих наши душу и тело леностию и нерадением, и возбуди нас от сна греховнаго, да благодарственно вопием Богу: Аллилуиа.

Икос 12

Поюще Твоя чудеса, бывшая в древняя и настоящая времена, хвалим Тя, Владычице, яко живоносный источник благодати и неистощимую чудес реку, бездну бо милости и щедрот даровала еси роду христианскому явлением честных икон Твоих. Сего ради и мы, припадающе к честней иконе Твоей «Державней», со умилением вопием Ти сице:

Радуйся, Церкве Небесныя и земныя украшение; радуйся, девства честный покрове и ограждение.

Радуйся, светлое пророческое сбытие; радуйся, всехвальных апостолов восхваление.

Радуйся, честная похвало иереев благоговейных; радуйся, молние, неверных устрашающая.

Радуйся, славою чудес Твоих верных смыслы озаряющая; радуйся, печаль и скорбь нашу в радость претворяющая.

Радуйся, яко молиши Сына Твоего и Бога нашего всем нам спастися; радуйся, яко твориши милости всем в державный Твой покров притекающим.

Радуйся, Заступнице всех сущих в скорбех и болезнех; радуйся, всем с верою Тебе молящимся полезная дарующая.

Радуйся, Мати Божия Державная, Заступнице усердная рода христианскаго.

Кондак 13

О Всепетая Мати, Державная Владычице! Приими ныне сие малое моление наше и величия ради благости Твоея и неизреченных щедрот Твоих не помяни множества грехов наших, но исполни во благих прошения наша: даруй нам вся потребная к жизни и благочестию, избави нас от глада, болезней и печали, и Царствия Небеснаго наследники всех сотвори, верно вопиющих Богу: Аллилуиа.

Этот кондак читается трижды, затем 1-й икос «Ангелом радость приимшая…» и 1-й кондак «Избранней от всех родов …».

Молитва первая

О Державная Владычице, Пресвятая Богородице, на объятиих Своих держащая Содержащаго дланию всю вселенную, Царя Небеснаго! Благодарим Тя за неизреченное милосердие Твое, яко благоволила еси явити нам, грешным, сию святую чудотворную икону Твою во дни сии. Благодарим Тя, яко призрела еси с высоты святыя Своея на чад православных, и, яко солнце светлое, увеселяеши ныне изнемогшия от печали очеса наша пресладостным зрением державнаго образа Твоего! О Преблагословенная Матерь Божия, Державная Помощнице, Крепкая Заступнице, благодаряще Тя, со страхом и трепетом, яко раби непотребнии, мы припадаем, со умилением, с сокрушением сердечным, со слезами молим Тя: вкорени в сердцах всех нас правду, мир и радость о Дусе Святе, водвори в стране нашей тишину, благоденствие, безмятежие, любовь друг ко другу нелицемерную! Державою Твоею всесильною поддержи нас, слабых, малодушных, немощных, унылых, подкрепи, возстави! Яко да под державою Твоею всегда храними, поем, величаем и славим Тя, Державную Заступницу рода христианскаго во веки веков. Аминь.

Молитва вторая

О мира Заступнице, Матерь Всепетая, со страхом, верою и любовию припадающе перед честною иконою Твоею Державною, усердно молим Тя: не отврати лица Твоего от прибегающих к Тебе, умоли, Милосердная Матерь Света, Сына Твоего и Бога нашего, Сладчайшего Господа Иисуса Христа, да сохранит в мире страну нашу, да утвердит державу нашу в благоденствии, да избавит нас от междоусобныя брани и укрепит Святую Церковь нашу Православную, да непозыблему соблюдет ю от неверия, раскола и ересей. Не имамы бо иныя помощи, не имамы иныя надежды, разве Тебе, Пречистая Дево: Ты еси Всесильная христиан Заступница пред Богом, праведный гнев Его умягчающая. Избави всех, с верою Тебе молящихся, от падений греховных, от навета злых человек, от глада, скорбей и болезней. Даруй Нам дух сокрушения, смирение сердца, чистоту помышлений, исправление греховныя жизни и оставление согрешений наших, да вси, благодарне воспевающе величия Твоя, сподобимся Небеснаго Царствия и тамо со всеми святыми прославим Пречестное и великолепое Имя в Троице славимаго Бога: Отца, Сына и Святаго Духа. Аминь.